2022 г. — 150 гадоў з часу пабудовы царквы Праабражэння Гасподняга ў в. Трасцяніца (Камянецкі р-н; 1872), помніка народнага драўлянага дойлідства
Праваслаўная царква ў вёсцы Трасцяніца Камянецкага раёна Брэсцкай вобласці існавала ўжо ў 1541 г., калі ўладальнік мясцовых зямель Аляксандр Хадкевіч дараваў ёй фундуш. У 1685 г. канюшы ВКЛ Стэфан Францыск Сапега, знаходзячыся ў сваім спадчынным маёнтку Трасцяніца дараваў права на прыход святару Яну Духноўскаму, пры гэтым быў пацверджаны ранейшы дзедаўскі фундуш. З гэтага вынікае, што царква існавала не менш як 30–40 гадоў да 1685 г., але звестак пра гэты старажытны помнік не захавалася.
2022 г. — 550 гадоў з часу пабудовы Троіцкага касцёла ў в. Ішкалдзь (Баранавіцкі р-н; 1472), помніка архітэктуры позняй готыкі
Касцёл Святой Троіцы – каталіцкі храм XV ст.у вёсцы Ішкалдзь Баранавіцкага раёна Брэсцкай вобласці. Помнік архітэктуры ў стылі позняй готыкі, самы стары (з неперабудаваных) касцёл на тэрыторыі сучаснай Беларусі.
2022 г. — 120 гадоў з часу пабудовы Свята-Прачысценскай царквы ў аг. Дзівін (Кобрынскі р-н; 1902), помніка драўлянага дойлідства рэтраспектыўна-рускага стылю
Свята-Прачысценская царква знаходзіцца ў цэнтры аг. Дзівін Кобрынскага раёна Брэсцкай вобласці. Гэта другі дзеючы праваслаўны храм Дзівіна пасля храма святой Параскевы Пятніцы (1740).
2022 г. — 140 гадоў з часу пабудовы царквы ў гонар святой велікамучаніцы Параскевы Пятніцы ў в. Балоты (Кобрынскі р-н, 1882), помніка драўлянага дойлідства з рысамі стылю класіцызму
У пісьмовых крыніцах першая царква ў в. Балоты Кобрынскага раёна Брэсцкай вобласці згадваецца ў 1652 г. Паколькі значная частка зямель была забалочанай, яна была ўзведзена на пагорку. Генерал-губернатар М. М. Мураўёў, які паклаў канец польска-каталіцкаму дамінаванню над праваслаўнымі сялянамі, у памяць падзей 1863–1864 гг. падараваў Балоцкаму храму сярэбраны пазалочаны крыж, далейшы лёс якога, на жаль, невядомы.
3 мая 2022 г. — 155 гадоў з часу закладкі царквы свяціцеля Мікалая Цудатворца ў аг. Азяты Жабінкаўскага раёна (1867), помніка драўлянай архітэктуры неарускага стылю
Вытокі праваслаўнага храма ў аг. Азяты Жабінкаўскага раёна Брэсцкай вобласці звязаныя з берасцейскім родам Гайкаў, якія з’яўляліся ўладарамі маёнтка Азяты. Датай узвядзення царквыў паселішчы лічыцца канец ХV ст., а яе заснавальнікам — Мікалай Фёдаравіч Гайка, які дараваў першы фундуш на храм і назваў царкву ў гонар свайго нябеснага заступніка — свяціцеля Мікалая Цудатворца.
2022 г. – 110 гадоў з часу пабудовы Свята-Успенскай царквы ў в. Паніквы (Камянецкі р-н; 1912), помніка драўлянага народнага дойлідства
Дакладная дата заснавання Свята-Успенскай царквы ў вёсцы Паніквы Камянецкага раёна Брэсцкай вобласці невядомая. Некаторыя гісторыкі адносяць час будаўніцтва храма да 1710 г. ці 1717 г., іншыя – да канца XIX ст.
2022 г. – 230 гадоў з часу пабудовы сінагогі ў г. Століне (1792), помніка іудзейскай рэлігійнай архітэктуры
У ХVIII ст. у мястэчку Столін Берасцейскага ваяводства (цяпер г. Столін Брэсцкай вобласці), пражывала больш за 400 яўрэяў, яны складалі амаль палову насельніцтва мястэчка. У 1792 г. у цэнтры мястэчка іудзейская абшчына (кагал) пабудавала сінагогу, якая з’яўлялася цэнтрам духоўнага і культурнага жыцця абшчыны.
2021 г. — 300 гадоў з часу пабудовы храма Пакрова Прасвятой Багародзіцы ў в. Арэпічы (Жабінкаўскі р-н; 1721), помніка традыцыйнага драўлянага дойлідства
Царква Пакрова Прасвятой Багародзіцы размешчана ў цэнтры вёскі Арэпічы Жабінкаўскага раёна Брэсцкай вобласці. Датай узвядзення лічыцца 1721 г. Раней на месцы Свята-Пакроўскай царквы знаходзіўся драўляны храм, збудаваны па ўніяцкіх канонах, які згадваецца ў крыніцах за 1620-я гг.
21 лістапада 2021 г. — 320 гадоў з дня асвячэння Свята-Міхайлаўскай царквы ў в. Чэрск (Брэсцкі р-н; 1701), помніка драўлянага дойлідства
Краязнаўцы лічаць, што ў ХVІІ ст. на месцы в. Чэрск Брэсцкага раёна быў дубовы гай, вакол яго — непраходныя балоты. Сюды прыйшлі перасяленцы, якія пабудавалі з дубоў невялікую царкву. Пазней, калі тут з’явілася вёска, храм быў дабудаваны, асвячоны ў імя святога архангела Міхаіла. Мяркуецца, што здарылася гэта 21 лістапада 1701 г.
22 кастрычніка 2021 г. — 155 гадоў з дня асвячэння сабора ў імя святога князя Аляксандра Неўскага ў г. Пружаны (1866), помніка архітэктуры позняга класіцызму
З ростам горада Пружаны Гродзенскай губерні (цяпер Брэсцкай вобласці) у сярэдзіне ХІХ ст. з’явілася надзённая патрэба ў вялікім праваслаўным храме. 29 красавіка 1864 г. на сходзе прадстаўнікоў сельскіх сходаў Пружанскага павета было заяўлена аб гатоўнасці дапамагаць у будаўніцтве царквы як працай, так і грашыма.